पालघर :- हिंदवी स्वराज्याचे संस्थापक, आदर्श राज्यकारभाराचे प्रतीक आणि पराक्रमाची प्रेरणा असलेल्या छत्रपती शिवाजी महाराज यांच्या जयंतीनिमित्त पालघर शहरात अभूतपूर्व उत्साहात भव्य पदयात्रेचे आयोजन करण्यात आले. पाचबत्ती चौक ते तहसील कार्यालय या मार्गावर निघालेल्या या पदयात्रेत राष्ट्राभिमान, शौर्य आणि सामाजिक एकतेचा संदेश प्रभावीपणे देण्यात आला.
सकाळी नेमक्या ७ वाजता सुरू झालेल्या या पदयात्रेला जिल्हाधिकारी डॉ. इंदु राणी जाखड यांच्या अध्यक्षतेखाली प्रारंभ झाला. यावेळी जिल्हा परिषद मुख्य कार्यकारी अधिकारी मनोज रानडे, पोलीस अधीक्षक यतिश देशमुख, निवासी उपजिल्हाधिकारी सुभाष भागडे, तहसिलदार रमेश शेंडगे, जिल्हा क्रीडा अधिकारी सुहास व्हनमाने यांच्यासह विविध विभागांचे अधिकारी, कर्मचारी आणि लोकप्रतिनिधी मोठ्या संख्येने उपस्थित होते.
‘जय भवानी, जय शिवाजी’च्या जोशपूर्ण घोषणांनी परिसर अक्षरशः दुमदुमून गेला. पारंपरिक वेशभूषेत सजलेली सांस्कृतिक पथके, ढोल-ताशांच्या गजरात पुढे सरकत होती. एनसीसी, एनएसएस, स्काऊट-गाईड, ‘माय भारत’ स्वयंसेवक तसेच शाळा-महाविद्यालयांतील विद्यार्थ्यांनी शिस्तबद्ध सहभाग नोंदवत पदयात्रेला वेगळेच तेज प्राप्त करून दिले.
यावेळी जिल्हाधिकारी डॉ. जाखड यांनी आपल्या भाषणात महाराजांच्या आदर्शांचा उल्लेख करत सुशासन, सामाजिक सलोखा आणि राष्ट्रसेवा यासाठी कटिबद्ध राहण्याचे आवाहन केले. “शिवरायांचा विचार हा केवळ इतिहास नाही, तर तो आजच्या प्रशासन आणि समाजासाठी मार्गदर्शक दीपस्तंभ आहे,” असे त्यांनी ठामपणे नमूद केले.
प्रशासनातील सर्व विभागांनी समन्वयाने केलेल्या नियोजनामुळे हा उपक्रम यशस्वी ठरला. विशेष म्हणजे, जिल्हा क्रीडा अधिकारी कार्यालयाच्या वतीने पदयात्रेत सहभागी झालेल्या सर्वांना ऑनलाइन प्रशस्तीपत्र देण्यात येणार असल्याची घोषणा करण्यात आली. या उपक्रमामुळे युवकांमध्ये नवचैतन्य संचारले आहे.
इतिहासाची परंपरा आणि आधुनिक तंत्रज्ञानाचा सुंदर संगम साधणारी ही पदयात्रा पालघरच्या सार्वजनिक जीवनात एक संस्मरणीय ठसा उमटवून गेली.
