नगरपरिषद–नगरपंचायत निवडणुकांसाठी पालघर पोलिस दल सज्ज; ०३ डिसेंबरला होणार मतमोजणी
पालघर : आगामी नगरपरिषद व नगरपंचायत सार्वत्रिक निवडणुका २०२५ दि. ०२ डिसेंबर २०२५ रोजी पार पडणार असून पालघर जिल्ह्यातील पालघर, डहाणू, जव्हार आणि वाडा या चार नगरपरिषद/नगरपंचायत क्षेत्रांमध्ये निवडणूक प्रक्रिया राबवली जाणार आहे. तसेच ०३ डिसेंबर रोजी मतमोजणी होणार आहे.
निवडणुकीच्या पार्श्वभूमीवर जिल्हाधिकारी, पालघर यांच्या आदेशानुसार परवानाधारकांकडील अग्निशस्त्रे जमा करण्याची प्रक्रिया पूर्ण करण्यात आली आहे.
डहाणू नगरपरिषद हद्दीत ४७ पैकी ४७, जव्हारमध्ये २७ पैकी २७, वाडा नगरपंचायतमध्ये १२३ पैकी १२३ शस्त्रे जमा झाली आहेत. पालघर नगरपरिषद हद्दीत ११८ पैकी ११४ शस्त्रे जमा झाली असून ४ परवानाधारकांना खेळाडू/संरक्षणाच्या कारणावरून सूट देण्यात आली आहे.
मतदान प्रक्रिया शांततेत, सुरळीत आणि सुरक्षिततेत पार पडावी यासाठी मोठा पोलिस बंदोबस्त तैनात करण्यात आला आहे. यात—
१ पोलिस अधीक्षक, १ अपर पोलिस अधीक्षक, ५ उपविभागीय पोलिस अधिकारी, ८ पोलिस निरीक्षक, ३६ सहाय्यक पोलिस निरीक्षक/उपनिरीक्षक, ४२४ पोलिस अंमलदार, २४० होमगार्ड, ३ आरसीपी प्लाटून, २ राज्य राखीव दलाच्या तुकड्या, ४ उपविभागीय पोलिस अधिकारी स्ट्रायकींग फोर्स, ३ राखीव स्ट्रायकींग पथके
असा भक्कम सुरक्षा ताफा जिल्ह्यात तैनात करण्यात आला आहे.
जास्तीत जास्त मतदारांनी मतदानाचा हक्क बजावावा, तसेच कोणताही कायदा व सुव्यवस्थेचा प्रश्न निर्माण न करता मतदान शांततेत पार पडण्यासाठी सहकार्य करावे, असे आवाहन पालघर जिल्हा पोलिस अधीक्षक श्री. यतिश देशमुख यांनी केले आहे.
